IstraMet

Ne postoji puno zapisa niti fotografija koji opisuju tu jednu od najjačih zima 20. stoljeća u Istri. Jedino nan ostaje da slušamo priče starijih ljudi koji su tada bili u najboljim godinama te im je zima 1956. ostala urezana u pamćenje, većinom zbog ondašnjeg teškog života. Ovu je priču ispričala jedna starija ženska osoba koja vrlo rado ali i subjektivno priča o nekim prošlim vremenima. Nažalost teško se drži priče te nerijetko zbog želje da sve događaje iz svog dugog života prepriča odjednom, priča malo jedan malo drugi događaj.

- Veriopak da, sad ču ti ja moj vnuk povidati jenu štoriju ča se dešavalo te zime kad je sniga bilo kako nikad pole.

Teg se domišjan jer se ubolila mala moja od 5 lit. San na noge tekla vaje do Pazina pa na vlak u Pulu a teg vrajžeg sniga je bilo do kolina. Još i dite san bono morala nositi u narušnju do vlaka pa hoj ti šnjon u Pulu. Lako je danaska. Imaš veturu i greš kamo te voja. Vaje mladoj moreš poj svaki dan a nikad smo se videvali samo znedije. Još u novembru pedeset i pete su gorili stari judi, voni su znali znaš, su gorili da bi moglo stisnuti te zime. I nisu žbajali. E, ti gorin ja, nikad su bili judi več zblagon i na doprten pa su znali. Danaska sve vidiš na televiziji i na unoj škatuli u kojoj pišeš slova pa ti sve dojde. Nisi ima ča ubuči, još si mora tenditi blago a nisi ima in ča jist davati. Su krave živile na slami, a dice je bilo čuda, joh.

Nisu bile lake, veropak ne. Pokojni did je u dečembru kad je več stislo poša u jučku bošku. To se hodilo da te nedan ne vidi. Hodija je guliti coke od drvi da imamo skin ložiti voganj. Uni bot je cila Istra bila gola. Ni bilo tako zarešteno. San i ja kako ženska morala gojiti dicu i nositi doma coke. Ma uni bot si bija mlad i si moga kako letrika hoditi simo-tamo. Danaska si star i bolan. Moreš samo medigu hoditi.

- Nu nu stara ti je boje da mi prontaš palentu!

- Muči stari vrag hodi u lišeru ti je boje, još ni nanka podne češ doj kako prasac, boje da sad malen povidam cilu štoriju da se navadi ča.

- Bin te plesnuja stara da iman ščin vrajža kurba svinja una…

- Da da, neka gre ča stari. Von tako i unako povida samo o ratu i o fašištima. Njega to vrime ne intereša jako. Von je dela u kavi a kampanju ni tendija, ča če to njemu. Pokojni did je dela svu kampanju dokle je moga a pole brižan ni moga nanka se ustati za poj pišati.

I ča san gorila nu? A to da, smo gulili coke. Ni bilo želizdenja kako danas. Si se potija magari je bilo zima. Još smo imali u dvoru jeneg vola, ma pole kad je stislo smo ga morali dati ča, ko ne skin biš kupija ča za pojist, kampanje nismo imali čuda, nisi moga ne. Su dica jili kako frantoji. Hi je šest bilo kako i Pjerovih. Moj pokojni Đovanin je bija pravi je. Ma uni bot se več štimalo mater i voca.

Pole kad je počelo padati, to je padalo kako da ga je vrag nosija. Tamo zajno pole noveg lita je prvi bot štabelo zameja. U današnje vrime kad pada, pada niš, na ritko. Ma uni bot je padalo kako muku da sipaš! U po ure je zamelo. Nanka ko si bia nidi vani nisi riva doj u hižu suh. I kada smo perali da je promolalo tamo februara nakraju je jopet stislo još i boje.

Ma to ne moreš verovati ne. Koliko dice se je ubolilo od uneg…kako se reče…meningitis…to je čuda dice uzelo. Još to judi pamete. Veropak da.

Nu, sad ču mu vrči jisti, palenta se mora čuda mišati. Une danas ča se delaju deset minuti, to ne vridi niš. Sad ču još staknuti jeno malo stin suhin da boje gori.

…

- Dobar tek.

- Fala lipa, češ snas jis?

- Ma neču, hvala lipa, san jia sad doma.

- Dobro. San jeno malo čuja ča ti je Fuma gorila, ma ti ni sve povidala. Ni ti povidala ki je kopa tunele u snigu da bin mogli zaj van iz hiže. San ja to dela, ma stara ti ni to povidala!

- Je je, veropak je, unobot je bija mlad. Mršav ma žilav, je moga cija dan badilati. Još su ti muški i pute čistili, je bilo sniga ražo zidi!

- San san, e da. Mali moj danas iman 2 kapota u ormarunu a unibot san ima nikeg dugeg bez batuni san se mora stiskati. Smo živili samo na divki, pitaj si voca. Je bija tust unako mali.

- E unibot kad se bija udrija si ga ti nosija medigu, san ja morala.

- Ma bog br… ni bija toliko težak ne.

- Da si bija muškardin biš ga ti bija nosija…

- Stara muči ti je boje da nebiš dobila po hrptu! ...

- I čete mi još ča povidati o toj zimi?

- Ma čemo ti boje povidati kako pedeset i devete bilo teplo lito! Smo kosili za seno po noči a spali u konobi!

- Čete mi to drugi bot, rečite mi još o zimi.

- A ča da ti rečen, pasalo je kako ča pasa i sve slabo. Smo se mučili. Mi je ža uneg vola vero je. Ča ni stara kum Liberat bija kupija pole jenega pa su svi hodili hnjen, pole kad mu je mater se hitila u šternu…